GEDAGTE VIR DIE WOENSDAG
Al die verrotte hout en ander ingelaste hout is nou vervang. Die basiese struktuur
van die deur is nou weer reg. Die deur is egter nog nie afgerond nie. Van die laste is
nie “flush” nie en die hout wat ingelas is, is nog nie mooi afgewerk nie. So hierdie
proses moet nou begin. Die skuurmasjien word nadergetrek. Eerste word al die
nuwe hout glad geskuur. Hier en daar is die hout grof en dit moet reggemaak word.
Dan word die laste mooi glad geskuur sodat dit netjies aanpas by die ander hout van
die deur.
Onthou dat die hout wat ons nuut inlas, nie altyd “splinternuwe” hout is is. Dit is
baiemaal hout wat verkry is toe ou huise afgebreek is en die hout herwin is. Hierdie
hout het dikwels spykergate en barste, wat nie mooi lyk nie. Wat jy nou doen, is baie
fyn werk. Jy meng van die houtsaagsels (wat jy kry uit al die saagwerk en
skaafwerk), meng dit met houtseëlaar (amper soos ‘n pasta) en dan vul jy die gate
en barste op. Op dié manier is die opvulwerk nie later sigbaar nie, want dit is
saagsels van dieselfde hout as wat jy gebruik het.
As dit klaar is, begin jy met die skuurwerk. Die totale deur word afgeskuur en alle
oneffenhede en krappe word glad geskuur. Ook die plekke waar jy die gate en
barste opgevul het. Op die ou einde het jy ‘n gadde en egalige oppervlakte.
Dit is nie so dat ons lewens noodwendig net uit verrotte en ingelaste hout bestaan
nie. Soms is die hout van ons lewens basies in ‘n goeie toestand. Daar is egter klein
barsies en spykergate wat afbreuk doen aan die voorkoms van ons deur. Klein
dingetjies wat reggemaak moet word, sodat die deur netjies en funksioneel kan
wees.
Ons kan so maklik hierdie tekortkominge miskyk en redeneer: Ag, in geheel is die
deur sterk, hoekom sal ons nou oor die klein foutjies bekommerd wees. Dit is egter
dikwels hierdie klein jakkalsies wat later die wingerd verniel.
Kom ek en jy laat God toe om hierdie barste en spykergate op te vul, dis net so
belangrik as die vervang van die verrotte hout ….
Ds Gerrie

Ons vra voorbidding:
 Koos Basson word moreoggend begrawe. Ons vra voorbidding vir sy
familie te midde van moeilike omstandighede waaronder die begrafnis
plaasvind
Ander nuus
 Ek het vandag 21 kospakkies vleis by Noorderpark ouetehuis gaan
aflewer, waar daar groot behoefte is
 Ek het ook 15 kospakkies aangekoop by PnP om gesinne in nood te help
en is besig om dit te versprei. Dankie vir almal wat finansiële hulp

aangebied het na my brief van Sondag. Ek kan julle verseker, daar is
groot nood

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more