GEDAGTE VIR DONDERDAG (23 APR)

Gister het ons gepraat oor die saad wat op die pad geval het en deur die voëls gevreet is. Vandag praat ons oor die saad wat op die klipbanke geval het. Die gelykenis vertel dat hierdie saad baie vinnig opgekom het. Omdat die grond egter nie diep genoeg was nie, het die saad nie wortel geskiet nie en toe die son warm word, het dit verskroei.

Jesus verduidelik dit as volg. Dit verteenwoordig mense wat die Woord van God met blydskap aanneem. Dit skiet egter nie wortel nie, en die oomblik wat daar probleme of teenspoed kom, dan vergaan hierdie saad. Dit is inderdaad waar van sekere mense. Hulle hoor van God, is baie opgewonde daaroor, maar daar is geen diepte nie. Sodra dinge nie perfek verloop nie, dan verdwyn al die “blydskap”. Dit beteken dat die saad, net so vinnig as wat dit opgekom het, weer tot niet gaan.

Ek het gister genoem dat hierdie gelykenis nie net op mense in die algemeen fokus nie, maar ook op my en jou persoonlik. Wat Jesus hier probeer kommunikeer, is dat, as die Woord van God net oppervlakkig in ons lewens teenwoordig is, dit nie gaan hou nie. As dit nie wortel skiet nie, gaan die son dit verskroei die oomblik wanneer ons onder druk kom. Wanneer God met ons praat, moet dit wesentlik deel van ons lewens word en moet ons dit gaan leef. Dit is die enigste manier om seker te maak dat die saad (die Woord van God) tot volle wasdom in ons lewe groei.

Ds Gerrie

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more