Gemeente ek groet julle op dag 8
Toe ek vanoggend met groot dankbaarheid gesond wakker geword het onthou
ek vir Jona wat drie dae in die maag van ‘n groot vis was, en ek dink, ek vat ons
drie weke van afsondering enige dag bo Jona se drie dae inperking in die maag
van ‘n vis.
Ek is besig om die nuwe boek van Roy Murray Daniel: Corona and the Cross, te
lees. In sy inleidende hoofstuk haal hy Pres. Donald Trump aan uit ‘n toespraak
wat hy op 04 Februarie 2020 gemaak het: “The years of economic decay are
over. We are moving forward at a pace that was unimaginable just a short time
ago, and we are never going back.” Roy haal dan Spreuke 27:1 aan: “ Moenie
roem oor wat jy môre verwag nie; jy weet nie wat die dag sal op lewer nie.” Ons
weet wat het met die VSA se ekonomiese groei geword sedert daardie
uitspraak, ‘n totale ineenstorting.
Ek het onmiddelik gedink aan Jakobus 4:13-17 (gaan lees dit gerus) wat handel
oor “Afhanklikheid van God.” Jakobus gebruik ook hier die voorbeeld van
uitsprake oor ekonomiese welvaart en vra dan die vraag hoe ons as mens in ons
beperktheid sulke uitsprake kan maak en dan gee hy vir ons die Bybelse riglyn,
ek haal vers 15 aan: “Julle moet eerder sê as die Here wil, sal ons lewe en sal
ons dit of dat doen.” Ek kan onthou in my groot word dae is die afkorting Dv
gebruik wanneer gepraat is oor iets wat môre of in die toekoms moet gebeur. Dv
is die Latynse afkorting van Deo volente, as die Here wil.
Geliefdes in die Here, wat het geword van ons totale afhanklikheid van God. In
baie gevalle het die tegnologie ons bron van afhanklikheid geword want ons
vertrou so op die tegnologie, want alles verloop so glad. My gebed is dat hierdie
wêreld krisis ons weer sal laat terugkeer na die ware bron van ons
afhanklikheid, die Here God. Ek bid dat daar weer ‘n herlewing sal kom in die
lewe van die kinders van God, dat ons soos Josua opnuut sal uitroep: “Ek en my
huis, ons sal die Here dien.” Kan jy onthou, Josua het opnuut hierdie toewyding
om die Here te dien gemaak toe hy al baie oud was.
Gee jy opnuut die eerste tree van algehele afhanklikheid en toewyding aan die
Here in jou huis, en neem jou huismense saam met jou soos Josua die volk
saam geneem het.
Ek groet met ‘n opgewonde verwagting van die herlewingskrag van die Heilige
Gees wat soos ‘n vuur in ons sal brand.
Ek skryf Dv. weer môre vir jou.
Vrede vir jou
Cois

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more