Gemeente ek groet julle op dag ses.
Hierdie tuis bly jassie skaaf darem nou nie meer so erg nie. Ek kom agter
verlang is ook n lekker kuiertyd. Nie daardie verlang na beter dae nie, maar om
net weer deur mooi herinneringe te blaai. So kom ek af op lekker herinneringe
saam met my broer wat ek nou al ses jaar gelede begrawe het. Kampvuur aande
in die Bosveld, kurpers vang op Loskopdam en dan een aand baie jare gelede
het hulle by ons gekuier en die aand laat kyk ons Stir Grazy van Gene Wilder op
tv. Hoekom onthou ek die aand en die fliek wat ons gekyk het nogsteeds, want
dit was n besonderse kosbare aand. Almal was al bed toe en ek en hy wou nog
so ‘n bietjie saam wakker wees want die volgende dag gaan hulle weer huis toe.
My broer het so gelag vir mannewales in die fliek dat ek kort kort moes
“pause”, die kosbare gedeelte is dat hy almal in die huis tv kamer toe gelag het
en na die fliek kuier ons almal saam tot amper hanekraai.
Weet jy Jesus is ook lief vir herinneringe want: Jesus het ons belowe dat die
Heilige Gees ons ook sal herinner aan alles wat Hy, Jesus, vir ons gesê en geleer
het. ‘n Mens kan egter net herinner word aan iets wat jy gelees of beleef het.
Ons moet die Bybel lees en God se genade en liefde beleef, dan terwyl ons met
die Heilige Gees wandel roep Hy dit vir ons in herinnering en daarin lê ons
krag.
Vandat die virus sy kop uitgesteek het, het ek nou al drie video’s op whatsapp
ontvang van ouens wat die Bybel en die Almatige God tot ‘n versie of twee wil
beperk en dan die vals profesie verkondig dat gelowiges nie siek sal word nie.
Dit is waar ek en jy in ons wandel met die Heilige Gees, herinner word aan wat
leer die Woord van God ons. So bly ons by die Waarheid en daar is niks
verkeerd daarmee om vir iemand wat jy vertrou te vra om jou te help om die
goed te verstaan nie. Gelukkig is die drie verskillende video’s aan my gestuur
deur drie kosbare mense in my lewe en kon ek met vrymoedigheid hulle help
om die regte perspektief te vind.
Geliefdes in die Here, die Bybel vertel ons van baie vals profete. In koning
Agab se tyd was daar 400 van hulle wat in die naam van die Here geprofeteer
het en die feit dat Agab die een ware profeet in die tronk stop en die 400 vals
profete glo, kos hom sy lewe. Omtrent elke evangeliese boek in die Nuwe
Testament waarsku ons teen vals profete en vals leraars. Jy kind van God, hou
by die Woord en die Waarheid, wandel met die Heilige Gees en jy sal nooit
beskaamd staan nie.
Ek groet jou met kosbare herinneringe van jare se saam wees as gemeente.
Vrede vir jou.
Cois

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more