Hier volg Donderdag se dagstukkie, asook `n paar logistiese reelings vir kennisname:

GEDAGTE VIR DIE DONDERDAG

Daar bly net een taak oor, maar dit is ‘n voortgaande proses. Die verrotte hou is uit, nie nuwe hout is ingelas, die barste en gate is opgevul en alles is gladgeskuur. Die probleem met hout is dat jy dit nie net so kan los nie. Jy moet die hout behandel. Anders kan die hout byvoorbeeld vog trek en dan begin die verrottingsproses van voor af. Wat ons dus gebruik, is houtseëlaar.

Jy sorg dat al die stof verwyder is, en dan het jy seëlaar en ‘n kwas nodig. Dis ook nie sommer net ‘n kwas gryp en daar gaan jy nie. Die geheim is om die seëlaar saam met die grein van die hout op te sit, nie dwars oor die grein nie. Op dié manier kom die grein van die hout op sy beste na vore. Nou moet dit behoorlik droog word. Daarna skuur jy alles weer met staalwol af, en herhaal die proses. Eers dan is jou deur afgewerk en afgerond. En oor ‘n jaar of twee, moet jy dit weer doen, en oor nog ‘n jaar of twee weer ‘n keer. Die punt is: die deur moet in stand gehou word ….

Die manier waarop die groot Skrynwerker met ons werk, is dieselfde. Soms moet hy verrotte of goedkoop hout uitsaag, nuwe hout inlas, die gate en barste toemaak, alles weer gladskuur en dan seëlaar opsit. En dan moet God heeltyd nuwe seëlaar opsit om seker te maak daar kom nie weer skade nie. Dit is nie ‘n “once off” nie, dis ‘n instandhoudingsPROSES.

Die Bybel verwys daarna as heiligmaking. Dit is die proses waartydens God voortdurend besig is om seker te maak dat ons deur stewig is en in stand gehou word. Dit hou nooit op nie. Die mooiste verduideliking van heiligmaking is vir my: Die proses waartydens God my al meer en meer soos Jesus maak ….

Gebedsversoeke

  • Kom ons bid vir die komende Paasnaweek: ons eie eredienste en orals waar eredienste uitgesaai gaan word

  • Ons bid vir almal wat op een of ander wyse deur die Korona Virus geraak word

Indien julle bewus is van iemand waar daar voedselnood is, kontak my asb. Ek is besig om voedselpakkies bymekaar te maak om dit beskikbaar te stel. As julle ‘n bydrae wil maak hiervoor, kontak my ook asb. Ek het reeds byna R10 000 se kospakkies versprei. Die nood is groter as wat ons dink.

Ds Gerrie
082 940 5453

Liewe gemeente

Dit is vandag twee weke sedert die “lockdown” begin het. Ek vertrou dat dit goed gaan met julle. Ons staan op die vooraand van Paasnaweek, een van die raarste Paasnaweke wat ek seker sal beleef sedert ek dominee geword het. Ek glo egter dat God vir ons iets besonders in plek het vir hierdie naweek.

EREDIENSTE TYDENS DIE PAASNAWEEK

Ek herhaal graag die inligting wat ek verlede Sondag uitgestuur het. Die uitsendings vir Goeie Vrydag en Paassondag is opgeneem en word om 09h00 uitgesaai.

Die temas vir die twee eredienste is as volg:

Goeie Vrydag Was Judas van die begin af verdoem om Jesus te verraai, of het hy wel ‘n eie keuse gehad ?

Paassondag Die opstanding van die man aan die kruis

Ons gaan Vrydagoggend ook saam Nagmaal gebruik. Ek wil dus vra dat julle brood en wyn (druiwesap/vrugtesap) gereed sal hou daarvoor.

Julle is welkom om familie en vriende te laat weet van ons dienste, as hulle graag wil inskakel. Ek gee weer die link:


Ons sal na die eredienste ook ‘n alternatiewe link deurstuur (per sms) as julle weer na die eredienste wil luister of as julle dit vir iemand anders wil stuur om ná die tyd daarna te luister.


ONS PROJEK OM KOS TE VOORSIEN

Julle sal onthou dat ek Sondag gevra het dat julle my moet laat weet as julle weet van gesinne waar daar nood is. Ek het ook gevra vir bydraes, indien dit vir julle moontlik is, om hierdie projek moontlik te maak.

Waar staan ons tans?

Baie dankie aan almal wat ‘n bydrae gemaak het, sommige het in die kerk se rekening inbetaal, andere het vir my kontant gebring. Ek waardeer.

Dit was, sedert Sondag, vir my moontlik om byna R 10 000 se kospakkies te versprei, binne en buite ons gemeente:

  • Ek kon 21 pakkies met vleis gaan aflewer by Noorderpark Ouetehuis in Wolmer. Ek wens julle kon daardie bejaardes se dankbare oë sien toe ek met die vleis daar aankom …. Dankie aan Tileba Vleismark (Marlize en haar personeel) wat die pakkies vir my opgemaak het

  • Ek het reeds 15 kospakkies by Pick n Pay afgehaal en kon dit versprei (Dankie aan Henko en sy personeel wat moeite gedoen het om dit vir my gereed te kry). Dit is ongelooflik om mense se dankbaarheid te beleef as jy by hulle huise opdaag met ‘n kospakkie

  • More kry ek nog kospakkies wat afgelewer moet word. Uiteraard beteken dit ek moet myself blootstel en baie rondry (met my masker, handskoene, “hand sanitizer” EN wettige permit !!), maar ek vertrou die Here daarvoor ….

  • Indien jy weet van nood, laat my asseblief weet. Indien jy ‘n bydrae kan maak, kontak my ook asseblief. Ek kan julle verseker die nood is baie groter as wat ons dink

Mag julle ‘n geseënde Paasnaweek beleef. Die Here hou sy hand oor ons.

Ds Gerrie


Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more