Liewe gemeente,

Ek deel met julle `n paar gedagtes, asook `n skrywe vir julle aandag:

Liewe gemeente,

Ek dink vandag aan die woorde van die Amerikaanse digter Theodor Roethke:” In a dark time, the eye begins to see”. Inderdaad. In donker, uitdagende tye sién ons werklik. Hierdie woorde spook vandag by my. Ek sien hoe ek die lewe, my werk en my kerk, as vanselfsprekend aanvaar het. Ek sien hoe ek mense as vanselfpsrekend aanvaar het.  Ek probeer die laaste erediens onthou wat ek bygewoon het, en ek verlang na die samesyn en die saam-aanbidding. Ek onthou ons Paaseier-skattejag sam met ons jeug. Min het ons geweet dat dit die laaste keer sal wees wat ons in `n lang tyd gaan saam wees. Ek onthou my laaste huisbesoek ( oom Stephen  en tannie Susan Liebenberg). Min het ek geweet ek gaan hulle vir`n lang tyd nie sien nie. Ek onthou (met spyt) hoe my laaste tenniswedstryd in `n woordewisseling ontaard het (ek het gelo dat my afslaan `n kishou was, en my broer het dit uitgeroep). Vandag wens ek dat ek weer `n tennisbal kan slaan!

Ek lees in Lukas 16(die verhaal van Lasarus en die ryk man) hoe die ryk ma elke dag by Lasarus verbygestap het, en hom net nie gesién het nie. Later verlang hy na die arm man... Die ryk man was só gewoond aan die gang van elke dag dat hy nie gesien het wat rondom hom aangaan nie. In hierdie tyd van afsondering besef ek hoe ek elke dag as vanselfsprekend aanvaar het, en hoe maklik ek  nie meer gesién het nie.

Ek glo ons gaan deur hierdie tydperk kom met `n hernude passie en waardering vir die lewe. Ek glo dat ons mekaar, en die lewe, meer gaan waardeer.

Groete en sterkte
Ds Johan


Maandag 13 April

Goeienaand aan almal

Ek wil julle graag op hoogte hou van ons gemeentesituasie, gegewe die feit dat die grendeltydperk met twee weke verleng is. Ek dink ons almal besef waarskynlik dat die impak hiervan veel verder gaan strek as 30 April ….

ONS EREDIENSTE

Ek is baie dankbaar dat dit vir ons moontlik was om die twee eredienste tydens die Paasnaweek uit te saai. Weer eens baie dankie aan Peet de Lange wat dit vir ons moontlik gemaak het.

Ons sal voortgaan met die uitsaai van eredienste totdat die “lockdown” verby is. Ons sal julle op hoogte hou via die Facebookblad. Eerskomende Sondag se diens sal deur ds Johan waargeneem word.

Ek wil graag noem. Daar was navrae of ons nie die briewe op Whatsapp kan plaas nie. Ongelukkig kan ons nie, ons stelsel maak nie voorsiening daarvoor om “bulk” Whatsapps uit te stuur nie

NUUS OOR LIDMATE

  • Ons het baie hartseer beleef die afgelope naweek. Een van ons jongmense, wat verlede jaar belydenis van geloof afgelê het, Natasha Smit, is die afgelope naweek oorlede na ‘n bloedklont. Sy was 17 jaar oud en ‘n matriekleerling aan Pretoria Noord Hoërskool. Ons vra asseblief julle voorbidding vir haar ouers, Natie en Tersia, en haar sussie, Anika. Ek het hulle vandag besoek en die seer is baie groot
  • Tannie Corrie Baragwanath het ook ‘n bloedklont in haar been. Dit gaan beter met haar, volgens oom Stan. Tannie Corrie, ons bid vir jou
  • Marietjie Bezuidenhout gaan more teater toe vir ‘n “scope” na haar kankerbehandeling. Marietjie, ons bid dat die uitslag goeie nuus sal wees

ONS PROJEK OM KOS TE VOORSIEN

Ek is steeds besig om kospakkies beskikbaar te stel waar daar nood is. Tot op hede kon ek ongeveer R 14 000 se kospakkies beskikbaar stel. In terme van ander projekte is dit waarskynlik ‘n klein bedraggie, maar ek kan julle verseker daar is groot dankbaarheid.

Ek wil weer vra, as jy weet van nood, laat my asseblief weet. As jy ‘n bydrae kan maak, laat my ook weet.

Dankie aan almal wat reeds bygedra het.

Kom ons bid asseblief vir mekaar …. en pas julleself asseblief op

Ds Gerrie


Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more