Liewe gemeente,

Een van die voordele van die inperking is dat `n mens tyd kry om aan dinge te dink waaraan mens nooit gewoontlik dink nie. Tyd is in hierdie opsig `n gawe. Vanoggend dink ek aan engele (waarskynlik omdat ek gisteraand na Aretha Franklin se liedjie “Angel” geluister het). Hoekom praat ons vandag so min oor engele? Is dit `n goeie ding dat die woord basies uit ons woordeskat verdwyn het? Ek lees weer wat die bekende Ou-Testamentikus Claus Westermann oor engele geskryf het in sy deeglike studie getiteld"Gottes Engel brauchen keine Flügel"oftewel: "God se engele het nie vlerke nodig nie". Hy merk op dat dit moeilik is om `n “bybelse” siening van engele te defineer, omdat die Bybel in verskillende tye verskillend oor engele praat. Hy wys dan dat die engele-tekste eintlik na God wil wys. Engele word dikwels juis geteken sonder vlerke. In tye van nood word mense getroos deur gewone mense. Eers later kom hulle agter dat dit engele was (Genesis 18 bly `n mooi voorbeeld hiervan).

Ek keer terug na Westermann se opmerking dat engele-tekste eintlik op God wil fokus. Beteken die feit dat ons min oor engele praat, ook dat ons te min oor God praat? Is die feit dat ons nie engele raaksien nie, omdat ons verleer het om God te sien? (lees weer Hebrieërs 13:2 waar ons opgeroep word om gasvry te wees, want ons gaste kan dalk engele wees. Blykbaar is ons onvermoë om engele raak te sien, al `n ou probleem). Ek wonder of ons nie dalk verleer het om die wonderlike, die goddelike raak te sien nie? Ons lewens het so gejaag geword dat ons nie meer die wonderlike, die goddelike raaksien en waardeer nie. In elke krisis is daar iets te leer. Mag ons weer leer om God, engele, en die wonderlike raak te sien, te waardeer,en te deel. Mag ons weer daaroor práát. 
Groete
Ds Johan 

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more