Florandia

GEDAGTE VIR DONDERDAG (7 MEI)

Gister het ons gesels oor die gedagte dat die profete die volk aangevat het omdat hulle nie die Wet van die Here nakom nie. Daarmee het hy vir hulle gesê dat hulle nie moet kla oor ander se optrede as hulle eie huis nie in orde is nie.

Die profete het egter wel die volk se besware verstaan, veral ten opsigte van die koning en sy amptenare wat die volk uitgebuit het en allerlei onreg gepleeg het en toegelaat het. Luister wat sê Miga in hoofstuk 3: “Luister, leiers van Jakob, regeerders van Israel! Weet julle nie wat reg is nie? Julle wat die goeie haat en die verkeerde liefhet.” Daarna beskryf Miga hoe die leiers van Israel die gewone mense uitbuit en verontreg. Hy sê vir hulle: “Julle eet my volk op asof hulle vleis is.”

Hy is ook baie fel in die oordeel wat hy oor hulle aankondig: “Wanneer julle tot die Here roep, sal Hy julle nie antwoord nie en Hy sal Hom nie aan julle openbaar nie.” Miga skroom vir geen oomblik om die koning en sy amptenare uit te wys vir hulle wandade nie.

Ek glo dat die kerk, en ons as Christene, nie net die reg het nie, maar ook die verantwoordelikheid het om ons stemme te laat hoor as dinge in ons land nie reg loop nie. En die kerk het dit al by baie geleenthede wel gedoen. Natuurlik is daar slegte en goeie maniere om dit te doen. As ons, in ons protes, verkeerde metodes gebruik, is ons net so skuldig as diegene teen wie ons protesteer. As ons dit vanuit Christelike oortuigings en op Christelike wyse doen, dan het ons die reg om te protesteer.

Presies hoe ons dit gaan doen, gaan dus bepaal of ons sukses gaan behaal, en of ons bloot ons eie saak gaan benadeel met ons optrede.

Iewers het ek gelees: Menige verdienstelike saak is al gekelder deurdat dit verkeerd hanteer is ….

Ds Gerrie