Liewe gemeente,

Ons dink steeds rondom die tema van ons lewe as `n erediens. Anders gestel: `n erediens is nie net `n fisiese byeenkoms nie. Ons lewens kan ook `n voorbeeld van `n erediens wees. Vandag dink ons aan die gedagte van skuldbelydenis, wat `n belangrike deel van ons eredienste uitmaak.

Martin Luther was amper obsessief oor skuldbelydenis. Toe hy nog `n monnik in `n klooster was, het hy blykbaar van sy ander take opsy geskuif om tyd aan skuldbelydenis te spandeer. Volgens oorlewering het Luther soms ses ure per dag aan skuldbelydenis afgestaan! Luther se lewe het verander nadat die hoof van die klooster, Johan Staupiz, vir hom geleer het dat skuldbelydenis meer is as selfopgelegte strawwe en skuldgevoelens, maar dat dit gepaard moet gaan met `n ware hartsverandering.  `n Ander interessante aspek is dié van skuldbelydenis aan `n ander gelowige. Luther het inderdaad gereageer teen die korrupsie in die Roomse gebruik van belydenis  aan `n priester, maar hy het steeds in sy onderrig  klem gelê op persoonlike belydenis teenoor `n mede-gelowige. Selfs op sy sterfbed het hy die idee ondersteun. Dietrich Bonhoeffer het ook hierde gedagte sterk beklemtoon. Daar lê waarde daarin om `n christen-vertroueling te hê met wie jy oor jou lewe en sonde kan praat. Dit maak ons waarlik vry. In `n spioenasie-film gegrond op een van John le Carré se romans, sê `n karakter (as hy na `n spesifieke persoon verwys):"He is a fanatic, and a fanatic always hides a secret". Skuldbelydenis maak ons inderdaad vry van die donker en geheimsinnige kant van ons lewens.  Die akademiese wêreld is laasweek geskud toe `n vooraanstaande Ou-Testamentikus vir besit vir kinderpornografie gearresteer is. Hy is intussen tot `n jaar tronkstraf gevonnis. In die hof het hy getuig dat hierdie donker,geheime kant van sy lewe hom letterlik tot waansin gedryf het. Sonde doen dit aan ons, en net opregte skuldbelydenis kan ons waarlik vrymaak.

Luther se klem op skuldbelydenis lyk dalk vir ons vreemd, maar ek dink gereeld aan Psalm 139 se laaste woorde: "Deurgrond my, o God, deurgrond my hart, ondersoek my, sien tog my onrus raak. Kyk of ek nie op die verkeerde pad is nie en lei my op die beproefde pad". Ons kan nooit gewoond raak aan ons oortredinge nie, en ons kan dit nooit sommer net as vanselfsprekend neem nie. Ons moét bly fokus om ons harte te reinig en ons sondes te bely. Mag hierdie belangrike deel van die erediens elke dag in ons lewens teenwoordig wees.

Groete
Ds Johan

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more