Dagstukkie Woensdag 8 Julie 2020.
Goeie môre gemeente.
Ek dink vandag aan die invloed wat musiek op die mens gehad het deur al die eeue. Baie jare gelede het ‘n egpaar wat baie jonger as ons was, en baie goeie huisvriende van ons, se huwelik deur ‘n “afwesig van mekaar” tyd gegaan. Hulle het met my kom praat en na die gesprek het ek net besef hulle is besig om mekaar te verloor omdat hulle mekaar nie meer hoor nie.
Ek besluit toe om vir hulle ‘n lied te skryf waarin hulle weer na mekaar kan luister. ‘n Lied wat ‘n gesprek tussen hulle moet wees waarin hulle weer mekaar se harte kan hoor. Ek het toe die lied geskryf, getoonset en vir hulle gegee. Gelukkig is die vroutjie musikaal en kon sy die lied vir hulle op die klavier speel en sing....vandag is hulle kinders al groot en hulle is steeds dol verlief en gelukkig.
Ken jy
1
Ken jy die rooi van ‘n ryp granaat
Verstaan jy die hartklop van jou lewensmaat
Ken jy die roep van ‘n Piet-my-vrou
Verstaan jy haar liefde wat jou omvou
Refrein:1
Sy is my sonskyn en sy is my lag
Sy’s die mooi in my elke dag
Sy is my môrester die nag is verby
Ja ek weet sy’s die regte een vir my
2
Is daar ‘n vonkel in jou oё getooi
As hy jou aanraak en sê jy is mooi
Voel jy die dartels van vlinders om jou
Verstaan jy sy liefde wat jou omvou
Refrein:2
Hy is my sonskyn en hy is my lag
Hy’s die mooi in my elke dag
Hy is my môrester die nag is verby
Ja ek weet hy’s die regte een vir my
3
Ken jy die gloed van ‘n kaggel se vuur
Teen die winter se kou in die na-nag se uur
Sien jy nog die mooi van die hemel se blou
Verstaan jy die liefde wat jou omvou
Refrein1 en refrein2

Dit bring ons by die Psalms, die grootste musiek wat nog ooit geskryf is.Die Psalms is liede wat geskryf is waarin die skrywers hul harte voor God oopmaak, waar hulle God laat hoor wat die emosies is wat in hul harte leef. Die Ps gebede is ook my en jou gebede, ons nood, verlange, vrese, soeke na antwoorde, ons jubel lof en ons lofoffers, ons stil word en wag, ons hoop op uitkoms in tye van nood. Dit is liede en gedigte waar in ons met ons hele menswees voor die troon van God kom kniel en bid. Die Psalms is musiek van heling, troos, hoop, verwagting en musiek waar God ons in die lied antwoord.
Geliefdes in die Here, ons moet mekaar hoor. Die lewe is te kosbaar om toe te laat dat stilte afstand bring. Ons is nou vir baie langer tye saam, gryp die geleentheid aan om weer die hartklop van mekaar se liefdestaal te hoor.
God wil ons ook hoor. Hy wil ook die hartklop van ons liefdestaal vir Hom hoor. In die Bybel hoor ons die hartklop van God se liefdestaal vir ons, ‘n liefdes taal waarin Hy selfs Sy Seun in ons plek gee. Gryp ook hierdie tyd van afsondering aan om met God ‘n nuwe gesprek te begin. ‘n Gesprek waarin jy soos die Psalm skrywers jou liefde vir Hom, jou lewe, jou toekoms en jou ewigheids hoop voor Sy troon neerlê.
Ek het al van die kansel af gesê ek is lief vir julle, net ingeval jy daardie die dag nie daar was nie of dalk al vergeet het sê ek weer vir julle, ek is lief vir elkeen van julle.
Ek groet julle met vreugde in my hart.
Cois

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more