Dagstukkie 12 Okt 2020.

Liewe gemeente

Ek was eenkeer op ‘n sake besoek in Durban gewees. Ek gaan eet toe sommer vroeg in die restuarant op die grondvlak van die hotel waar ek tuis gegaan het, want ek wou nog bietjie gaan werk en voorberei vir die volgende dag se vergadering. Die plek was nog taamlik leeg want dit was maar so 19:30 en ek merk toe die jong paartjie op wat so ‘n paar tafeltjies van my af in die hoek gesit het. Duidelik baie verlief en ek dink toe so by myself, seker ‘n “honeymoon” paartjie.

By die huisbak gekom oppad na my kamer toe, stap die jong paartjie saam met my in die huisbak in. Ek groet hulle toe en die jongman, terwyl hy die vroutjie styf om die middel vashou vra my toe: “Sir, do you also think that I have the most beautiful wife ever?” nogal ‘n moeilike vraag om n vreemdeling te vra. Sê ek ja, kan ek ‘n opstopper kry, sê ek nee gaan ek verseker ‘n opstopper kry. Toe antwoord ek hom so: “My vriend, die vraag wat jy my vra is irrelevant vannaand, jy moet jouself die vraag of sy nog vir jou die mooiste vrou is oor twintig jaar vra, en jou antwoord dan sal bepaal of vannaand spesiaal sal wees vir die res van jou lewe.” Dit is waar die hysbak toe stop op my vloer en ek hulle ‘n goeie aand toewens en uitstap terwyl hulle hoёr op gaan. Daar was nie tyd vir hom om my te antwoord nie, maar ek onthou vandag nog die verbasing op sy gesig.

Ek het agterna bietjie gedink oor hierdie op my voete dink antwoord aan die jongman en tot die slotsom gekom dit is dalk relevant ook in ons verhouding met ons Here om dan vir onsself te vra: Is my liefde vir die Here nog net so brandend soos in die begin, tenspyte van dinge wat dalk op my pad met my gebeur het. Geliefdes in die Here, hoe opgewonde is ons nog om Bybel te lees, om spesiaal tyd te maak om te bid, om intiem in gesprek met God te wees, Hom te hoor uit Sy Woord en Hom dan te antwoord uit ons hart.

Die Here antwoord hierdie vraag van Sy kant af en sê: Ek die Here is altyd daar vir jou, Ek sal jou nooit verlaat nie. My Seun se uitroep, “dit is volbring” aan die kruis is die bewys van My liefde vir jou en Sy opstanding dui die weg aan om vir ewig by My te wees.

Vrede vir jou

Cois



Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more