GEDAGTE VIR DIE DAG

MAANDAG 19 OKTOBER


Job 1:1-12

Dit is maklik om God te dien, behalwe as ….


In die eerste vers van die boek Job word ons aan die hoofkarakter van die verhaal voorgestel. Reg aan die begin word dit duidelik gestel watter tipe mens hy was: "Hy was vroom en opreg en het God gedien en die kwaad vermy." Wat meer sou God van sy dienaar kon verwag? Hy word ook geteken as 'n baie welvarende man. Hy het sewe seuns en drie dogters gehad, tien kinders in totaal. Sy godsdienstige lewe was uit die boonste rakke. Inderdaad 'n baie besondere en merkwaardige mens, dié Job. Vir seker was hy nie iemand met wie enigiets ooit kon skeefloop nie! Is dit regtig so? Beteken 'n gesonde en lewendige verhouding met God dat ek en jy alle pyn, hartseer en seerkry gespaar is? Kom ons kyk wat die verhaal van Job vir ons hieroor wil sê.


"Dit is nie sonder rede dat Job U dien nie. U beskerm hom dan … alles wat hy doen (is) voorspoedig." Klink hierdie woorde dalk of dit net sowel ek en jy kon wees wat dit gesê het? Hoe moeilik kan dit nou wees om God te dien, te aanbid en te loof as jou lewe net vreugde, voorspoed en plesier inhou. Satan het min of meer dieselfde vermoede gehad. Daarom konfronteer hy God met die woorde: "Maar raak nou net aan sy besittings en kyk of hy U nie in die gesig vloek nie." Satan was oortuig dat Job se vroomheid nie toe te skryf was aan sy werklike toewyding aan God nie, maar dat hy net in God se "goeie boekies" probeer bly het om te verseker dat sy lewe sonder sorge voortduur. God dink anders. Hy gee Satan toestemming om Job te beproef - hy mag hom net nie doodmaak nie. Ek kan nie help om te wonder hoe God hieroor gevoel het nie. Sê nou net Job se lewe was regtig 'n rookskerm, dat dit vir hom eintlik net oor sy rykdom en besittings gegaan het? Ek kry so 'n koue gevoel langs my rug af as ek dink hoe ek en jy sou reageer indien God ons voor so 'n toets sou stel.

Comments

Post a Comment

Popular posts from this blog

Liewe gemeente, Ek kry nooit regtig kans om my kat dop te hou nie. Gewoontlik kom ek laat in die middae by die huis, en sodoende het ek geen manier om te weet hoe sy dag benader nie. Nou het ek egter baie tyd, en ek staan verstom oor sy erg roetine-gedrewe dag program. Hy loop elke dag die selfde paaie, en ek kry hom sekere tye van die dag op spesifieke plekke in die tuin. Hy is só stiptelik in sy program dat ek my horlosie volgens hom kan instel. Ek besef al hoe meer hoe die inperkingstyd my óók gedwing het om `n strenger roetine te volg. `n Groot deel van die dag bestaan uit skoolwerk. Dan is daar dagstukkie skryf, kosmaak, preke skryf en navorsing. Ek kry selfs meer tyd om baie meer gestruktureerd geestelike boeke te lees. Boonop kry ek tyd vir meer geordende stiltetyd. Dit het my laat dink... Jare terug het Gordon MacDonald `n boek gepubliseer wat in Afrikaans vertaal is met "` n Tyd vir Orde" . MacDonald het in dié boek beklemtoo...
Read more
Liewe gemeente, In een van my oordenkings het ek verwys na Romeine 12 en die gedagte van ons lewe as `n erediens. Ek wil hierdie week die gedagte uitbrei deur na die onderskeie elemente van die erediens te verwys. Deur hierdie oordenkings wil ek by die vraag uitkom: "Hoe kan ek `n erediens wees as ek nie fisies tussen ander gelowiges kan wees nie?" Ek wil vandag by die Wet begin. Ons verwys dikwels na die die Tien Gebooie as die Wet, alhoewel die Wet eintlik `n baie breër idee omvat. Die eerste gebod ( Jy mag naas My geen ander gode hê nie) is in `n sekere mate die opskrif, of die gedagte wat ál die gebooie vasvat. Anders gestel; die ander gebooie val in plek as die eerste gebod tot sy reg kom in my hart. Dit was `n blye dag vir my toe die boekwinkels vir die eerste keer weer oopgemaak het. My vreudge was nog groter toe ek `n kopie van Alan Greenspan se "Capitalism in America: A History " teen `n afslagprys raakgesien het. Greenspan w...
Read more
GEDAGTE VIR DIE DAG MAANDAG 7 SEPTEMBER Ek wil graag eerskomende Sondag hê dat ons saam Nagmaal gebruik by ons huise. Ek sal die besonderhede later in die week deurstuur. As voorbereiding daarvoor gaan elke dag ‘n Psalm as dagstukkie plaas, met die bedoeling dat ons dit lees en deel van ons gebed vir die week maak. In Psalm 8 besing Dawid die lof van God. Kom ons doen dit saam met hom. Lof aan die Skepper 1 Vir die koorleier: met musiek.`n Psalm van Dawid. 2 Here, ons Here, hoe wonderbaar is u Naam oor die hele aarde, hoe glansryk alles wat U in die hemelruim geplaas het! 3 Kinders en suigelinge besing die magtige werk wat U tot stand gebring het. So word u teëstanders, die vyande en wraakgieriges, tot swye gebring. 4 As ek u hemel aanskou, die werk van u vingers, die maan en die sterre waaraan U `n plek gegee het, 5 wat is die mens dan dat U aan hom dink, die mensekind dat U na hom omsien? 6 U het hom net `n bietjie minder as `n  hemelse wese gemaak en hom met aansien en eer gekro...
Read more